ئێران تۆپبارانی ناوچه‌ سنووریه‌كانی ده‌ستپێكرده‌وه‌

ناوچه‌ سنووریه‌كانی ده‌ڤه‌ری پشده‌ر جارێكی دیكه‌ له‌ لایه‌ن تۆپخانه‌كانی ئێرانه‌و تۆپباران كران و به‌ گوێره‌ی زانیارییه‌ فه‌رمییه‌كان هیچ زیانێكی گیانی له‌و تۆپبارانانه‌ نه‌كه‌وتوه‌ته‌وه‌.

 تۆپبارانه‌ی تۆپخانه‌كانی ئێران سنووری ناحیه‌ی ژاراوه‌ و سه‌نگه‌سه‌ری  سه‌ر به‌ قه‌زای قه‌ڵادزێی گرتوه‌ته‌وه‌ كه‌ ته‌نها 15 كیلۆمه‌تر له‌ سنووری ئێرانه‌وه‌ دوورن.

 قائیمقامی قه‌زای قه‌ڵادزێ عه‌بدوڵا حه‌سه‌ن رایگه‌یاند، تۆپبارانه‌كه‌ له‌ نیوه‌شه‌وی رابردوو تاوه‌كو پێش نیوه‌رِۆی ئه‌مرِۆ به‌رده‌وام بووه‌ و هه‌ریه‌ك له‌ سنووری گونده‌كانی ره‌زگه‌ و ماره‌دو و شناوه‌ و ده‌وروبه‌ری ئه‌و ناوچانه‌ی گرتوه‌ته‌وه‌ كه‌ كه‌وتوونه‌ته‌ باكووری قه‌ڵادزێ و هاوسنووری ئێران و خۆشبه‌ختانه‌ ئه‌و تۆپبارانه‌ هیچ زیانێكی گیانی لێنه‌كه‌وتوه‌ته‌وه‌.

تۆپخانه‌كانی سوپای ئێران به‌ بیانووی هه‌بوونی چه‌كدارانی پارتی ژیانی ئازاد (په‌ژاك) له‌و ناوچانه‌ ماوه‌ ماوه‌ ئه‌و ده‌ڤه‌ره‌ سنووریانه‌ تۆپباران ده‌كات  و ئه‌مه‌ش نیگه‌رانییه‌كی زۆری له‌ لای دانیشتوانی ناوچه‌كه‌ دروست كردووه‌ و هه‌ر به‌و هۆیه‌وه‌ به‌ ده‌یان خێزانی گوندنشین له‌ به‌هاری رابردوودا ناچاربوون مال َوحاڵ و كێڵگه‌ و باخ و بێستانه‌كانیان به‌ جێبهێڵن و ئاواره‌ی ناوچه‌كانی دیكه‌ی ده‌ڤه‌ری پشده‌ر و بیتوێن بن و به‌ هۆی هاتنه‌وه‌ی وه‌رزی پایز و نه‌بوونی خزمه‌تگوزاری زۆربه‌ی ئه‌و خێزانانه‌ ناچاربوونه‌ بگه‌رِێنه‌وه‌ گونده‌كانیان و ئێستا له‌ ژژێر هه‌رِه‌شه‌ی مه‌ترسی تۆپباراندان.
peyamner